Psa 42 | Geez | STEP | ፍታሕ ፡ ሊተ ፡ እግዚኦ ፡ ወተበቀል ፡ በቀልየ ፡ እምሕዝብ ፡ ውፁኣን ፡ እምጽድቅ ፤ እምብእሲ ፡ ዐማፂ ፡ ወጽልሕው ፡ ባልሐኒ ፡

Psalms 42

መዝሙር ፡ ዘዳዊት ።
1 ፍታሕ ፡ ሊተ ፡ እግዚኦ ፡ ወተበቀል ፡ በቀልየ ፡
እምሕዝብ ፡ ውፁኣን ፡ እምጽድቅ ፤
እምብእሲ ፡ ዐማፂ ፡ ወጽልሕው ፡ ባልሐኒ ፡
2 እስመ ፡ አንተ ፡ አምላኪየ ፡ ወኀይልየ ፡ ለምንት ፡ ተኀድገኒ ፤
ወለምንት ፡ ትኩዝየ ፡ ኣንሶሱ ፡ ሶበ ፡ ያመነድቡኒ ፡ ፀርየ ።
3 ፈኑ ፡ ብርሃነከ ፡ ወጽድቀከ ፡
እማንቱ ፡ ይምርሓኒ ፤ ወይስዳኒ ፡ ደብረ ፡ መቅደስከ ፡
ወውስተ ፡ አብያቲከ ፡ እግዚኦ ።
4 ወእበውእ ፡ ኀበ ፡ ምሥዋዒሁ ፡ ለእግዚአብሔር ፡
ኀበ ፡ አምላኪየ ፡ ዘአስተፈሥሓ ፡ ለውርዙትየ ፤
5 እገኒ ፡ ለከ ፡ አምላኪየ ፡ በመሰንቆ ።
ለምንት ፡ ትቴክዚ ፡ ነፍስየ ፡ ወለምንት ፡ ተሀውክኒ ፤
6 እመኒ ፡ በእግዚአብሔር ፡ ከመ ፡ እገኒ ፡ ሎቱ ፡
ወድኀኔ ፡ ገጽየ ፡ አምላኪየ ።